Prezident İlham Əliyevin ümumbəşəri humanizm dəyərlərinə sadiqliyini əks etdirən mühüm təşəbbüs
Müasir Azərbaycan dövlətinin inkişaf mərhələləri Prezident cənab İlham Əliyevin rəhbərliyi ilə təkcə siyasi və hərbi qələbələrlə deyil, eyni zamanda yüksək mənəvi dəyərlərə, humanizm və mərhəmət prinsiplərinə söykənən dövlət idarəçiliyi ilə səciyyələnir. Dövlət başçısının həyata keçirdiyi siyasət milli maraqlarla ümumbəşəri dəyərlərin üzvi vəhdətinə əsaslanır. Bu baxımdan 15 dekabr 2025-ci ildə amnistiya elan edilməsi təşəbbüsü Prezident cənab İlham Əliyevin humanizmə, ədalətə və sosial məsuliyyətə sadiqliyinin növbəti parlaq nümunəsidir.
Azərbaycan xalqı tarixi Zəfər nəticəsində suverenliyini tam bərpa etmiş, Konstitusiyanın ali hüquqi qüvvəsi ölkənin bütün ərazilərində təmin olunmuşdur. Bu qələbə təkcə hərbi-siyasi nailiyyət deyil, həm də hüquqi dövlət quruculuğunun, milli birlik və mənəvi dəyərlərin zəfəridir. Məhz belə bir tarixi mərhələdə irəli sürülən amnistiya təşəbbüsü dövlətin gücünü yalnız cəza mexanizmlərində deyil, bağışlama və islah etmə fəlsəfəsində gördüyünü nümayiş etdirir.
Amnistiya institutu hüquqi dövlətlərin ən ali humanist mexanizmlərindən biri hesab olunur. Bu institut cəmiyyətə təhlükə törətməyən, islah olunma potensialına malik şəxslərin yenidən sosial həyata inteqrasiyasına imkan yaradır. Prezident cənab İlham Əliyevin təşəbbüsü də məhz bu prinsiplərə əsaslanır.
Dövlət başçısı cəzadan azad etmənin yalnız hüquqi akt deyil, eyni zamanda tərbiyəvi və sosial əhəmiyyət daşıyan proses olduğunu dəfələrlə vurğulamışdır. Bu təşəbbüs insanlara ikinci şans vermək, onların cəmiyyətə faydalı vətəndaş kimi qayıtmasına şərait yaratmaq məqsədi daşıyır.
Amnistiya təşəbbüsü göstərir ki, Azərbaycan dövləti qalib mövqedən çıxış edərək cəmiyyət daxilində barış, qarşılıqlı etimad və sosial sabitlik yaratmağa xüsusi önəm verir. Dövlətin gücü yalnız sərtlikdə deyil, eyni zamanda bağışlamaqda, insana inam göstərməkdə özünü büruzə verir.
Bu addım həm də ictimai rəyə açıq mesajdır: qanuna əməl etmək, dövlətə sədaqət və faydalı vətəndaş olmaq hər kəs üçün əsas meyardır.
Amnistiya yalnız məhkum edilmiş şəxsləri deyil, bütövlükdə cəmiyyəti əhatə edən sosial hadisədir. Bu təşəbbüs ailələrin birləşməsinə, sosial gərginliyin azalmasına və ictimai etimadın möhkəmlənməsinə xidmət edir.
Azərbaycan tarixində Prezident cənab İlham Əliyevin imzaladığı əfv sərəncamları və amnistiya təşəbbüsləri artıq davamlı və sistemli xarakter almışdır. Bu fakt onu göstərir ki, humanizm təsadüfi addım deyil, dövlət siyasətinin ayrılmaz hissəsidir.
Prezident cənab İlham Əliyevin 15 dekabr 2025-ci ildə amnistiya elan edilməsi təşəbbüsü müstəqil Azərbaycanın gücünün, siyasi yetkinliyinin və yüksək mənəvi dəyərlərə sadiqliyinin göstəricisidir. Bu təşəbbüs suverenliyini tam bərpa etmiş, Konstitusiyanın ali hüquqi qüvvəsini bütün ərazilərində təmin etmiş bir dövlətin humanist mövqedən çıxış etdiyini sübut edir.
Amnistiya aktı cəmiyyətə inam, insana hörmət və gələcəyə ümid mesajıdır. Bu addım bir daha təsdiqləyir ki, Azərbaycan dövləti yalnız qalib deyil, eyni zamanda mərhəmətli və ədalətlidir.
Prezident cənab İlham Əliyevin rəhbərliyi ilə həyata keçirilən bu siyasət xalqın dövlətinə olan etimadını daha da möhkəmləndirir və müasir Azərbaycanın humanizm dəyərlərinə söykənən inkişaf yolunu aydın şəkildə nümayiş etdirir.
Zərdab rayon Mədəniyyət Mərkəzinin direktoru Elyurə Məmmədova
Şərh yazın