Zəfər Günü həm də milli həmrəyliyin qorunmasının nə qədər vacib olduğunu xatırladır
Bu gün 8 Noyabr tarixini böyük qürur hissi ilə qeyd edərkən bir daha əmin oluruq ki, Azərbaycan xalqının iradəsi, Vətən sevgisi və mübarizə ruhu heç vaxt sarsılmayıb. İllərlə davam edən torpaq həsrəti xalqımızı öz amalından döndərməyib. Nəhayət, 44 günlük Vətən müharibəsində qazanılan Qələbə ilə Azərbaycan öz gücünü, birliyini və haqq mübarizəsini dünyaya nümayiş etdirdi.
8 Noyabr – Zəfər Günü bizim üçün sadəcə təqvimdə qeyd olunan bayram deyil. Bu gün şəhidlərimizin müqəddəs xatirəsi, qazilərimizin qəhrəmanlığı, əsgər və zabitlərimizin fədakarlığı, xalqımızın birliyi və dövlətimizin tarixi Qələbəsinin rəmzidir. Bu tarix hər zaman yaddaşımızda yaşayacaq, gələcək nəsillərə ötürüləcək və Azərbaycan xalqının qürur mənbəyi olaraq qalacaqdır.
Zəfər Günü həm də milli həmrəyliyin qorunmasının nə qədər vacib olduğunu xatırladır. Müharibə dövründə xalqımızın nümayiş etdirdiyi birlik, qarşılıqlı dəstək və həmrəylik bu gün də ölkəmizin inkişafı üçün əsas amillərdən biri olmalıdır. Hər bir vətəndaş öz işi, fəaliyyəti və məsuliyyəti ilə Azərbaycanın daha da güclənməsinə, dövlətimizin inkişafına və milli maraqlarımızın qorunmasına töhfə verməlidir.
Şuşa uğrunda döyüşlər Azərbaycan hərb tarixində özünəməxsus yer tutur. Dağlıq ərazidə, çətin hava və relyef şəraitində aparılan əməliyyatlarda Azərbaycan əsgərləri böyük qəhrəmanlıq göstərdilər. Xüsusi təyinatlı qüvvələrimiz mürəkkəb yollarla irəliləyərək şəhərə daxil oldular və əlbəyaxa döyüşlər nəticəsində Şuşanı azad etdilər. Bu əməliyyat Azərbaycan əsgərinin cəsarətini, döyüş hazırlığını və Vətən sevgisini bir daha nümayiş etdirdi.
Vətən müharibəsində yaralanaraq sağlamlığını itirən qazilərimiz də xalqımızın qəhrəmanlıq tarixinin canlı nümunələridir. Onlar döyüş meydanında göstərdikləri şücaətlə Azərbaycan tarixinə adlarını yazdırıblar. Bu gün qazilərimizin sosial müdafiəsinin gücləndirilməsi, müalicəsi, reabilitasiyası, məşğulluğunun təmin edilməsi və onların cəmiyyətə inteqrasiyası dövlət siyasətinin mühüm istiqamətlərindəndir. Şəhidlərimizin xatirəsini yaşatmaq və qazilərimizə ehtiram göstərmək Zəfər Gününün mənəvi mahiyyətini daha da artırır.
Qoy üçrəngli Azərbaycan bayrağı hər zaman azad və bütöv Vətənimizin səmasında dalğalansın! Şəhidlərimizin əziz xatirəsi daim uca tutulsun, qazilərimizə ehtiram heç vaxt əskilməsin. Zəfər Günümüz mübarək olsun!
Eltun Məmmədli – Zərdab şəhər sakini, fəal gənc
Şərh yazın