Müharibə dövründə Azərbaycan əsgəri böyük çətinliklərə baxmayaraq, irəliləyərək torpaqlarımızı bir-birinin ardınca işğaldan azad etdi
2020-ci il sentyabrın 27-də Ermənistan silahlı qüvvələrinin növbəti hərbi təxribatlarına cavab olaraq Azərbaycan Ordusu əks-hücum əməliyyatlarına başladı. Beləliklə, xalqımızın 30 ilə yaxın gözlədiyi azadlıq mübarizəsinin həlledici mərhələsi başlandı. 44 gün davam edən Vətən müharibəsi Azərbaycan xalqının birliyini, ordumuzun gücünü və əsgər və zabitlərimizin qəhrəmanlığını bütün dünyaya nümayiş etdirdi.
Müharibə dövründə Azərbaycan əsgəri böyük çətinliklərə baxmayaraq, irəliləyərək torpaqlarımızı bir-birinin ardınca işğaldan azad etdi. Cəbrayıl, Füzuli, Zəngilan, Qubadlı rayonları, Hadrut qəsəbəsi və digər yaşayış məntəqələri azadlığına qovuşdu. Xüsusilə Şuşa şəhərinin azad edilməsi müharibənin taleyində mühüm rol oynadı. Çətin relyef və mürəkkəb döyüş şəraitində həyata keçirilən Şuşa əməliyyatı Azərbaycan hərb tarixinin ən yaddaqalan səhifələrindən birinə çevrildi.
2020-ci il noyabrın 8-də Şuşanın azad olunması xəbəri bütün ölkədə böyük sevinc və qürur hissi yaratdı. Bu hadisə xalqımızın uzun illər davam edən Qarabağ həsrətinin sona yaxınlaşdığını göstərdi. Noyabrın 10-da imzalanmış üçtərəfli bəyanatla hərbi əməliyyatlar dayandırıldı və Ağdam, Kəlbəcər, Laçın rayonları Azərbaycana qaytarıldı. Beləliklə, 44 günlük Vətən müharibəsi Azərbaycanın tarixi Qələbəsi ilə başa çatdı.
Bu Qələbə yalnız hərbi uğur deyildi. Eyni zamanda, xalqımızın milli birliyinin, dövlətimizin gücünün və ordumuzun yüksək döyüş qabiliyyətinin göstəricisi idi. Müharibə günlərində ölkəmizdə yaşanan həmrəylik, insanların cəbhəyə və əsgərlərimizə göstərdiyi dəstək bir daha sübut etdi ki, Azərbaycan xalqı öz dövlətinin və ordusunun ətrafında birləşməyi bacarır.
2023-cü il sentyabrın 19-20-də həyata keçirilən lokal xarakterli antiterror tədbirləri isə Azərbaycanın suverenliyinin tam bərpası istiqamətində mühüm tarixi hadisə oldu. Tədbirlər nəticəsində Qarabağ bölgəsində qanunsuz silahlı birləşmələrin fəaliyyəti dayandırıldı və ölkəmizin bütün ərazilərində dövlət suverenliyinin təmin olunması üçün şərait yarandı.
2023-cü il oktyabrın 15-də Prezident İlham Əliyevin Xankəndi şəhərində Azərbaycan Bayrağını ucaltması xalqımızın yaddaşında xüsusi yer tutan tarixi hadisəyə çevrildi. Uzun illər yalnız arzu etdiyimiz bu mənzərə artıq reallıq idi. Üçrəngli bayrağımızın Xankəndidə dalğalanması Azərbaycanın ərazi bütövlüyünün və suverenliyinin tam bərpasının rəmzinə çevrildi. Bu hadisə xalqımıza böyük sevinc yaşatmaqla yanaşı, gələcək nəsillər üçün də mühüm tarixi örnək oldu.
Azərbaycanın qazandığı bu uğurda Prezident, Müzəffər Ali Baş Komandan İlham Əliyevin rəhbərliyi, qətiyyətli siyasi mövqeyi və həyata keçirdiyi məqsədyönlü siyasət mühüm rol oynadı. Müharibə dövründə dövlət başçısının xalqa müraciətləri, beynəlxalq media nümayəndələrinə verdiyi müsahibələr, Azərbaycanın haqq mövqeyini dünya ictimaiyyətinə çatdırması ölkəmizin informasiya mübarizəsində də mövqeyini gücləndirdi. O, həm siyasi, həm diplomatik, həm də informasiya cəbhəsində Azərbaycanın maraqlarını müdafiə etdi.
Fərid Qurbanov – Zərdab rayonu, Təzəkənd kənd sakini, fəal gənc
Şərh yazın