Vətən müharibəsinin ən mühüm hadisəsi isə noyabrın 8-də Şuşa şəhərinin azad edilməsi oldu
Şuşanın azad olunması həm hərbi, həm də mənəvi baxımdan böyük əhəmiyyət daşıyırdı. Bu şəhər Azərbaycan xalqı üçün sadəcə bir yaşayış məntəqəsi deyil, milli mədəniyyətimizin, tariximizin və mənəvi dəyərlərimizin mühüm mərkəzidir.
Şuşa Azərbaycanın musiqi, ədəbiyyat və mədəniyyət tarixində xüsusi yer tutur. Bu şəhərdən çoxlu sayda görkəmli sənətkarlar, şairlər və musiqiçilər yetişib. Uzun illər işğal altında qalan Şuşanın azad edilməsi xalqımızın mənəvi dünyasında böyük sevinc yaratdı.
Şuşa əməliyyatı Azərbaycan əsgərinin qəhrəmanlığının və peşəkarlığının ən parlaq nümunələrindən biri kimi tarixə düşdü. Çətin dağlıq ərazidə həyata keçirilən bu əməliyyat nəticəsində şəhərin azad olunması müharibənin sonrakı gedişinə ciddi təsir göstərdi.
2020-ci il noyabrın 10-da imzalanmış üçtərəfli Bəyanatla hərbi əməliyyatlar dayandırıldı. Sənədə əsasən Ağdam, Kəlbəcər və Laçın rayonları da Azərbaycana qaytarıldı. Beləliklə, 44 günlük Vətən müharibəsi Azərbaycanın tarixi Qələbəsi ilə başa çatdı.
Bu Qələbənin arxasında yüzlərlə, minlərlə insanın fədakarlığı dayanırdı. Şəhidlərimiz Vətən uğrunda canlarından keçdilər, qazilərimiz sağlamlıqlarını itirdilər, əsgər və zabitlərimiz böyük qəhrəmanlıq göstərdilər. Onların hər birinin xidmətləri Azərbaycan xalqının yaddaşında əbədi yaşayacaq.
44 günlük Vətən müharibəsi zamanı Azərbaycan xalqının nümayiş etdirdiyi birlik və həmrəylik də Qələbənin əldə olunmasında mühüm rol oynadı. Müharibənin ilk günlərindən ölkənin hər yerində insanlar ordumuza dəstək olmaq üçün bir araya gəldilər. Hər kəs öz imkanları daxilində Vətən müharibəsinə töhfə verməyə çalışırdı.
Cəbhədə döyüşən əsgərlərimiz arxa cəbhədə bütün xalqın onlara dəstək olduğunu hiss edirdilər. İnsanlar hər gün qələbə xəbərlərini gözləyir, şəhid ailələrinə və yaralılara yardım göstərir, ordumuzun uğurlarına sevinirdilər.
Azərbaycanın müxtəlif bölgələrində yaşayan insanlar arasında fərq qoyulmadan hamı bir məqsəd ətrafında birləşmişdi. Xarici ölkələrdə yaşayan soydaşlarımız da Azərbaycanın haqq səsini dünyaya çatdırmaq üçün fəal iş aparırdılar. Ölkəmizin dostları və haqq işimizi dəstəkləyən insanlar da bu həmrəyliyə öz töhfələrini verirdilər.
Müharibə dövründə siyasi baxışından, yaşından və sosial vəziyyətindən asılı olmayaraq insanların böyük əksəriyyəti dövlətimizin və ordumuzun yanında oldu. Bu, xalqımızın milli məsələlərdə necə birləşə bildiyini bir daha göstərdi.
Prezident cənab İlham Əliyevin rəhbərliyi ilə xalqın, dövlətin və ordunun birliyi “Dəmir yumruq” ifadəsində öz əksini tapdı. Bu ifadə qısa müddətdə xalqımızın həmrəyliyinin, qətiyyətinin və milli iradəsinin rəmzinə çevrildi.
Müharibə yalnız döyüş meydanında aparılmırdı. Həmin dövrdə informasiya sahəsində də ciddi mübarizə gedirdi. Ermənistan tərəfinin həqiqətə uyğun olmayan məlumatlarının yayılmasına qarşı Azərbaycanın mövqeyinin dünya ictimaiyyətinə çatdırılması vacib idi.
Prezident cənab İlham Əliyevin dünyanın aparıcı media qurumlarına verdiyi çoxsaylı müsahibələr bu baxımdan mühüm əhəmiyyət daşıdı. Dövlət başçısı Azərbaycanın haqlı mövqeyini beynəlxalq ictimaiyyətə çatdırır, münaqişənin tarixini və müharibənin səbəblərini izah edirdi. Bununla da Azərbaycan informasiya sahəsində də öz mövqeyini qətiyyətlə müdafiə etdi.
Rəmzi Şirinov-Zərdab rayonu, Dəli Quşçu kənd tam ümumtəhsil orta məktəbinin direktoru
Şərh yazın