Torpaqlarımızın azad olunması üçün ilk növbədə güclü dövlətə və güclü orduya ehtiyac var idi
Ali Baş Komandan cənab Prezident İlham Əliyevin rəhbərliyi ilə həyata keçirilən siyasətin əsas istiqamətlərindən biri də məhz Azərbaycanın hərbi gücünün artırılması oldu.
İllər ərzində ölkəmizdə ordu quruculuğuna xüsusi diqqət yetirildi. Silahlı Qüvvələrimizin maddi-texniki bazası gücləndirildi, hərbi hissələr müasir silah və texnika ilə təmin edildi, əsgər və zabitlərin peşəkarlığının artırılması üçün mühüm işlər görüldü. Hərbi təhsil sisteminin inkişaf etdirilməsi, yeni hərbi texnologiyaların tətbiqi və ordunun döyüş hazırlığının yüksəldilməsi qarşıya qoyulan əsas vəzifələrdən idi.
Azərbaycanın öz hərbi sənaye potensialını yaratması da bu sahədə mühüm addımlardan biri oldu. Ölkəmizdə müxtəlif hərbi təyinatlı məhsulların, zirehli maşınların, pilotsuz uçuş aparatlarının, atıcı silahların və digər texnikaların istehsalına başlanıldı. Bununla Azərbaycan təkcə xaricdən hərbi texnika alan ölkə kimi deyil, həm də öz müdafiə sənayesini inkişaf etdirən dövlət kimi mövqeyini möhkəmləndirdi.
Ordunun güclənməsi ilə yanaşı, ölkənin iqtisadi inkişafı da diqqət mərkəzində saxlanıldı. Çünki güclü iqtisadiyyat olmadan güclü ordu yaratmaq və onu müasir tələblərə uyğun inkişaf etdirmək mümkün deyil. Azərbaycanın enerji sahəsində həyata keçirdiyi layihələr, yeni nəqliyyat yollarının açılması və xarici ölkələrlə iqtisadi əlaqələrin genişləndirilməsi dövlətimizin imkanlarını artırdı.
Bakı-Tbilisi-Ceyhan neft kəməri, Cənub Qaz Dəhlizi və digər beynəlxalq layihələr Azərbaycanın dünya iqtisadiyyatında rolunu gücləndirdi. Ölkəmiz beynəlxalq aləmdə etibarlı tərəfdaş kimi tanındı, müxtəlif dövlətlərlə əməkdaşlıq əlaqələri genişləndi.
Bütün bu işlər son nəticədə Azərbaycanın siyasi, iqtisadi və hərbi gücünün artmasına xidmət etdi. 2020-ci ildə baş verən hadisələr göstərdi ki, illər ərzində görülən işlər öz nəticəsini verdi. Azərbaycan dövləti qarşıya qoyduğu əsas məqsədə nail olmaq üçün həm iqtisadi, həm siyasi, həm də hərbi baxımdan hazır idi.
2020-ci il sentyabrın 27-də Ermənistan silahlı qüvvələrinin genişmiqyaslı hərbi təxribatlarına cavab olaraq Azərbaycan Ordusu əks-hücum əməliyyatlarına başladı. Beləliklə, xalqımızın 30 ilə yaxın davam edən torpaq həsrətinə son qoyacaq 44 günlük Vətən müharibəsi başladı.
Müharibənin ilk günlərindən Azərbaycan əsgərləri böyük ruh yüksəkliyi, cəsarət və əzmkarlıq nümayiş etdirdilər. Hər gün cəbhədən gələn qələbə xəbərləri xalqımızın sevincini artırır, insanlarda torpaqlarımızın azad olunacağına inamı daha da gücləndirirdi.
Azərbaycan Ordusu qısa müddət ərzində bir çox yaşayış məntəqələrini, strateji yüksəklikləri və mühüm əraziləri işğaldan azad etdi. Cəbrayıl, Füzuli, Zəngilan, Qubadlı, Hadrut və digər ərazilərin azad olunması ordumuzun gücünü və döyüş qabiliyyətini bütün dünyaya göstərdi.
Bu müharibə Azərbaycan əsgərinin öz torpağı uğrunda necə böyük fədakarlıq göstərə biləcəyini bir daha sübut etdi. Əsgərlərimiz çətin relyefdə, ağır döyüş şəraitində, hər cür maneəyə baxmayaraq irəli getdilər. Onlar yaxşı bilirdilər ki, hər azad edilən kənd və şəhər illərdir doğma yurdlarından ayrı yaşayan insanların evlərinə qayıtması deməkdir.
Gülnaz Məmmədova – Zərdab şəhər sakini, təqaüdçü
Şərh yazın