Bayraq bir millətin şərəf tarixi, müstəqillik pasportu və azadlıq nəfəsidir

Bayraq bir millətin şərəf tarixi, müstəqillik pasportu və azadlıq nəfəsidir

 

Bizim üçün Azərbaycan Respublikasının Dövlət bayrağı sadəcə bir kumaş parçası deyil — o, milli kimliyimizin, varlığımızın və suverenliyimizin ən ali simvoludur. Hər il noyabrın 9-da ölkəmizdə böyük qürurla qeyd edilən Dövlət Bayrağı Günü, təkcə bir bayram rəmzi deyil, həm də xalqımızın azadlıq mübarizəsinin, tarixi keçmişinin və parlaq qələbələrinin təntənəsidir.

Azərbaycan Respublikasının Əmək Məcəlləsinə əsasən, bu əlamətdar gün ölkədə qeyri-iş günü olan bayramlar siyahısındadır. Bu da hər bir vətəndaşımıza imkan verir ki, ailəsi ilə birgə bayrağımızın keçdiyi şərəfli yola bir daha nəzər salsın, bu qüruru qəlbində hiss etsin.

Dövlət Bayrağı Gününün kökləri tariximizin ən parlaq səhifələrindən biri olan Azərbaycan Xalq Cümhuriyyətinin (AXC) adı ilə sıx bağlıdır. 1918-ci il noyabrın 9-da Bakıda, hökumətin iclasında üçrəngli Dövlət bayrağı ilk dəfə rəsmi olaraq qəbul edildi. Həmin gün bu müqəddəs bayraq AXC Nazirlər Şurasının binası üzərində ucaldıldı və 1920-ci ilin aprel ayında Sovet işğalına qədər dövlət statusunu şərəflə qorudu.

Bu bayraq xalqımızın azadlıq məfkurəsinə, milli-mənəvi dəyərlərə və ümumbəşəri ideallara olan sarsılmaz sadiqliyini bütün dünyaya nümayiş etdirirdi.

Sovet imperiyası dövründə üçrəngli bayrağımızın dalğalanması qadağan edilsə də, o, xalqın qəlbində və yaddaşında bir ümid çırağı kimi yaşamağa davam etdi. İllər sonra həmin tarixi əmanət yenidən öz həqiqi sahibinə qaytarıldı.

1990-cı il noyabrın 17-də Naxçıvan Muxtar Respublikası Ali Məclisinin sədri, Ümummilli Lider Heydər Əliyevin təşəbbüsü və rəhbərliyi ilə keçirilən tarixi sessiyada bu üçrəngli bayraq Naxçıvan Muxtar Respublikasının dövlət bayrağı olaraq təsdiq edildi. Həmin sessiyada Naxçıvan Ali Məclisi Azərbaycan SSR Ali Soveti qarşısında vəsatət qaldırdı ki, bu bayraq bütün Azərbaycanın rəsmi dövlət rəmzi kimi tanınsın.

Bu cəsarətli və tarixi addımın ardınca:

1. 1991-ci il fevralın 5-də Azərbaycan Respublikasının Ali Soveti həmin vəsatətə baxaraq “Azərbaycan Respublikasının Dövlət bayrağı haqqında” Qanun qəbul etdi və üçrəngli bayrağımızı yenidən rəsmi Dövlət bayrağı elan etdi.
2. 1991-ci il oktyabrın 18-də qəbul olunan “Azərbaycan Respublikasının dövlət müstəqilliyi haqqında” Konstitusiya Aktı ilə ölkəmiz Azərbaycan Xalq Cümhuriyyətinin varisi kimi onun dövlət rəmzlərini, o cümlədən müqəddəs bayrağını tam bərpa etdi.

Bayraq sadəcə vizual bir rəmz deyil, həm də dövlətin ləyaqətidir. Azərbaycan Respublikası Konstitusiyasının 75-ci maddəsinə əsasən, hər bir vətəndaş dövlət rəmzlərinə — bayrağına, gerbinə və himninə hörmət etməyə borcludur. Dövlət rəmzlərinə hörmətsizlik göstərilməsi qanunla müəyyən edilmiş ciddi məsuliyyətə səbəb olur.

 

Nailə Əliyeva Zərdab rayon Mərkəzləşdirilmiş Kitabxana Sisteminin direktoru