Qarabağ Zəfərimiz

Qarabağ Zəfərimiz

Azərbaycan xalqının tarixində elə hadisələr var ki, onlar yalnız müəyyən bir dövrün deyil, bütöv bir xalqın taleyinin, milli kimliyinin və dövlətçilik tarixinin ən mühüm səhifələrinə çevrilir. 2020-ci il noyabrın 8-də Şuşa şəhərinin işğaldan azad edilməsi məhz belə tarixi hadisələrdəndir. Bu möhtəşəm Qələbə xalqımızın milli iradəsinin, sarsılmaz birliyinin, Vətən sevgisinin və tarixi ədalətin təntənəsi kimi yaddaşlara həkk olunmuşdur.

Şuşa Azərbaycan xalqı üçün sadəcə bir şəhər deyil, milli-mənəvi dəyərlərimizin, zəngin mədəniyyətimizin, musiqi və ədəbiyyatımızın beşiyidir. XVIII əsrdə Pənahəli xan tərəfindən əsası qoyulan bu qədim şəhər qısa müddətdə Qarabağın mühüm siyasi və mədəni mərkəzinə çevrilmişdir. Molla Pənah Vaqif, Xurşidbanu Natəvan, Üzeyir Hacıbəyli, Bülbül və Xan Şuşinski kimi görkəmli şəxsiyyətlərin adı Şuşa ilə bağlıdır. Məhz buna görə Şuşanın işğaldan azad edilməsi Azərbaycan xalqı üçün həm hərbi, həm də mənəvi baxımdan müstəsna əhəmiyyət daşıyırdı.

Azərbaycanın tarixi Zəfərinin əsasında güclü dövlətçilik siyasəti, iqtisadi inkişaf və müdafiə qüdrətinin möhkəmləndirilməsi dayanır. Ümummilli Lider Heydər Əliyevin müəyyənləşdirdiyi siyasi strategiya Prezident İlham Əliyev tərəfindən uğurla davam etdirilmiş, müasir və qüdrətli Azərbaycan Ordusu formalaşdırılmışdır. Bu möhkəm təməl 2020-ci ildə tarixi ədalətin bərpasına imkan yaratdı.

2020-ci il sentyabrın 27-də başlayan 44 günlük Vətən müharibəsi Azərbaycan xalqının birliyini, Ordumuzun gücünü və əzmini bütün dünyaya nümayiş etdirdi. Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusu işğal altında olan torpaqlarımızın azadlığı uğrunda misilsiz qəhrəmanlıq göstərdi. Ön cəbhədə əsgər və zabitlərimizin şücaəti, arxa cəbhədə xalqımızın həmrəyliyi Qələbəmizin əsas amillərindən oldu.

Vətən müharibəsinin ən mühüm və həlledici mərhələsi isə Şuşa əməliyyatı idi. Şəhərin mürəkkəb dağlıq relyefi, sıldırım qayalıqları və strateji mövqeyi hərbi əməliyyatların həyata keçirilməsini son dərəcə çətinləşdirirdi. Azərbaycan hərbçiləri bütün çətinliklərə baxmayaraq, böyük cəsarət, peşəkarlıq və fədakarlıq nümayiş etdirərək Şuşanı azad etdilər. Bu əməliyyat Azərbaycan hərb tarixində misilsiz qəhrəmanlıq nümunəsi kimi yer aldı.

2020-ci il noyabrın 8-də Prezident, Müzəffər Ali Baş Komandan İlham Əliyev Şəhidlər xiyabanından xalqa müraciət edərək Şuşanın azad edildiyini bəyan etdi. Dövlət başçısının “Əziz Şuşa, sən azadsan! Əziz Şuşa, biz qayıtmışıq!” sözləri həmin gün milyonlarla azərbaycanlının sevinc və qürur hissini ifadə etdi. Şuşanın azad edilməsi müharibənin gedişinə həlledici təsir göstərdi və noyabrın 10-da hərbi əməliyyatların dayandırılması ilə nəticələnən üçtərəfli Bəyanatın imzalanmasında mühüm rol oynadı.

Şuşa Zəfəri yalnız hərbi uğur deyil, həm də milli-mədəni irsimizin dirçəldilməsinin başlanğıcıdır. Şəhər azad edildikdən sonra burada genişmiqyaslı bərpa və quruculuq işlərinə başlanıldı. 2021-ci il mayın 7-də Şuşa Azərbaycanın mədəniyyət paytaxtı elan edildi, 2022-ci il isə ölkəmizdə “Şuşa İli” kimi qeyd olundu. Sonrakı illərdə şəhərin Türk dünyasının və İslam aləminin mədəniyyət paytaxtı kimi tanınması onun beynəlxalq nüfuzunu daha da artırdı.

Bu gün Şuşada tarixi abidələr bərpa olunur, yollar və infrastruktur yenilənir, mədəni tədbirlər təşkil edilir. “Xarıbülbül” Beynəlxalq Musiqi Festivalı və Vaqif Poeziya Günləri şəhərin zəngin mədəni ənənələrinin yenidən yaşadılmasına xidmət edir. Böyük Qayıdış proqramı çərçivəsində keçmiş məcburi köçkünlərin doğma yurda qayıtması isə Zəfərimizin ən mühüm nəticələrindəndir.

Şuşa Zəfərinin gənc nəslə öyrədilməsi də xüsusi əhəmiyyət daşıyır. Təhsil müəssisələrində Vətən müharibəsinin tarixinin, qəhrəman hərbçilərimizin şücaətinin, Şuşanın tarixi və coğrafi xüsusiyyətlərinin təbliği milli-mənəvi dəyərlərə bağlı, vətənpərvər gəncliyin yetişdirilməsinə mühüm töhfə verir. Çünki öz tarixini və milli kimliyini dərindən bilən gənclik dövlətimizin gələcəyinə daha böyük məsuliyyətlə yanaşır.

Bu gün Şuşa azaddır, yenidən qurulur və öz tarixi şöhrətinə qovuşur. Onun küçələrində dalğalanan üçrəngli bayrağımız şəhidlərimizin qanı, qazilərimizin fədakarlığı və xalqımızın sarsılmaz iradəsi bahasına qazanılmış Qələbənin rəmzidir.

Şuşa əməliyyatı Azərbaycan xalqının qəhrəmanlıq salnaməsinin ən parlaq səhifələrindən biridir. Bu tarixi Qələbə sübut etdi ki, milli birlik, güclü dövlətçilik və Vətən sevgisi qarşıya qoyulan ən çətin məqsədlərə çatmağa qadirdir.

Ziya Nağıyev –Zərdab rayon Dəli Quşçu kənd sakini