Laçın: doğma yurda qayıdışın ünvanı
Bir şəhərin əsl gücü yalnız onun küçələrində, binalarında və yollarında deyil, ona bağlı insanların qəlbində yaşayır. Laçın da illər boyu öz sakinlərinin yaddaşında, xatirələrində və doğma yurda qayıtmaq arzusunda yaşadı. Bu gün isə həmin arzu gerçəyə çevrilib. Laçın yenidən öz sakinlərini qoynuna alır, şəhərdə yeni həyat qurulur. 26 Avqust – Laçın Şəhəri Günü bu baxımdan böyük tarixi və mənəvi əhəmiyyət daşıyır. 2022-ci il avqustun 26-da Laçın şəhərinə qayıdış təmin olundu. Bu tarix uzun illər doğma yurd həsrəti ilə yaşayan laçınlılar üçün unudulmaz bir günə çevrildi.
Laçın Azərbaycanın zəngin tarixə və gözəl təbiətə malik bölgələrindən biridir. Uca dağları, yaşıl meşələri, çayları və bulaqları ilə seçilən rayon xalqımızın mədəni irsində də mühüm yer tutur. Laçının hər kəndi, hər dağı və hər yolu burada yaşayan insanların xatirələri ilə bağlıdır. 1992-ci ildə Laçının işğal olunması rayon sakinlərinin həyatında ağır izlər buraxdı. Minlərlə insan öz evindən didərgin düşdü. Lakin illər keçsə də, laçınlıların doğma torpağa olan sevgisi və qayıdış ümidi heç vaxt sönmədi.
2020-ci ildə Vətən müharibəsində qazanılan tarixi Zəfər Azərbaycanın ərazi bütövlüyünün bərpasına yol açdı. Həmin ilin dekabrında Laçın rayonu Azərbaycana qaytarıldı. 2022-ci ildə isə Laçın şəhərinə qayıdış baş verdi. Bununla şəhərin həyatında yeni mərhələ başladı. Bu gün Laçında geniş quruculuq işləri həyata keçirilir. Yeni yaşayış binaları, məktəblər, sosial obyektlər və yollar inşa olunur. Şəhərin mühəndis-kommunikasiya sistemləri yenilənir, abadlıq işləri aparılır. Bütün bunlar sakinlərin rahat və müasir şəraitdə yaşaması üçün görülür. Laçına qayıdan ailələr üçün yeni evlərin tikilməsi xüsusilə sevindirici haldır. İllər sonra doğma torpağa qayıdan insanların öz evlərində yeni həyata başlaması şəhərin dirçəlişinin ən mühüm göstəricilərindən biridir. Rayonun iqtisadi inkişafı üçün də geniş imkanlar yaradılır. Kənd təsərrüfatı, heyvandarlıq, turizm və xidmət sahələrinin inkişafı yeni iş yerlərinin yaranmasına şərait yarada bilər. Laçının zəngin təbiəti və dağlıq əraziləri turizm üçün böyük potensiala malikdir. Bərpa olunan enerji sahəsində həyata keçirilən layihələr də Laçının gələcəyi üçün mühüm əhəmiyyət daşıyır. Rayonun çayları üzərində su elektrik stansiyalarının yaradılması təmiz enerji istehsalını artırır. Bu layihələr həm Laçının, həm də Azərbaycanın yaşıl enerji siyasətinə töhfə verir. Laçının gələcəyi uşaqların və gənclərin də taleyi ilə bağlıdır. Müasir məktəblərin, idman və mədəniyyət obyektlərinin yaradılması onların doğma yurdda sağlam və savadlı böyüməsinə imkan verəcək. Laçında yeni nəslin formalaşması şəhərin gələcək inkişafı üçün böyük əhəmiyyət daşıyır.
26 Avqust – Laçın Şəhəri Günü yalnız bir tarixi hadisənin qeyd edilməsi deyil. Bu gün həm də doğma torpağa bağlılığın, qayıdışın və yenidən qurulan həyatın rəmzidir. Laçın uzun illərdən sonra öz sakinlərinin səsi ilə yenidən canlanır. Bu gün Laçının qarşısında yeni imkanlar açılıb. Qarşıdakı illərdə şəhərin daha da böyüməsi, gözəlləşməsi və müasir yaşayış məkanına çevrilməsi üçün mühüm addımlar atılacaq. nLaçın doğma yurda qayıdışın sevincini yaşayan şəhərdir. Onun yenidən canlanması Azərbaycan xalqının yaddaşında xüsusi yer tutan tarixi hadisədir. Bu gün Laçın öz keçmişinə sahib çıxaraq gələcəyə inamla addımlayır.
Zərdab rayon Əlibəyli kənd tam orta ümumtəhsil məktəbinin müəllimi-Gülşən İsmayılova
Şərh yazın