2023-cü ilin 28 may tarixindən başlayaraq laçınlıların doğma yurda qayıdışına start verilib
Laçın rayonunun işğaldan azad olunması ilə uzun illər doğma yurdlarından ayrı düşmüş laçınlıların öz torpaqlarına qayıdışına yeni mərhələ qədəm qoydu. Azərbaycan dövlətinin həyata keçirdiyi genişmiqyaslı bərpa və quruculuq işləri nəticəsində Laçın yenidən müasir yaşayış məkanına çevrilir. 2023-cü il mayın 28-dən başlayaraq laçınlıların doğma şəhərə qayıdışına start verilməsi isə bu prosesin ən mühüm hadisələrindən biri oldu. Laçın şəhərinə ilk köç karvanının gəlməsi 31 ildən artıq davam edən həsrətə son qoydu. Beləliklə, uzun illər müxtəlif bölgələrdə müvəqqəti məskunlaşmış laçınlılar doğma şəhərlərinə qayıdaraq burada yeni həyata başladılar. Şəhərdə yaşayış binaları, sosial obyektlər, məktəblər, yollar və digər zəruri infrastruktur yaradılaraq sakinlərin rahat və təhlükəsiz yaşaması üçün hərtərəfli şərait formalaşdırılıb. Laçın rayonunda Böyük Qayıdış yalnız şəhərlə məhdudlaşmayıb. Qayıdış prosesi rayonun kəndlərini də əhatə edib. Zabux kəndi Laçın şəhərindən sonra sakinlərin qayıtdığı ilk yaşayış məntəqələrindən biri olub. 2023-cü il avqustun 25-də Zabux kəndinə ilk köç karvanı çatıb və bununla kənd sakinlərinin doğma yurda qayıdışı başlayıb. Rəsmi məlumatda ilk mərhələdə kəndə 20 ailənin köçürüldüyü bildirilir.
Laçın rayonunda əhalinin qayıtdığı digər yaşayış məntəqəsi Sus kəndidir. Tamamilə yenidən qurulan Sus kəndinə ilk köç karvanı 2024-cü ilin may ayında yola salınıb. Mayın 9-da ilk mərhələdə kəndə 20 ailə köçürülüb. Mayın 24-də isə növbəti köç karvanının gəlişi ilə kənddə ümumilikdə 59 ailənin, yəni 215 nəfərin daimi məskunlaşması təmin edilib. Beləliklə, Laçın şəhəri, Zabux və Sus kəndləri rayonun Böyük Qayıdış prosesinin artıq real şəkildə həyata keçirildiyi yaşayış məntəqələrinə çevrilib. 2024-cü ilin iyununda rəsmi məlumatda Laçın şəhəri, Zabux və Sus kəndləri daxil olmaqla, rayon üzrə 789 ailənin, 2944 nəfərin məskunlaşdığı bildirilib. Sus kəndinin yenidən qurulması zamanı yaşayış evləri ilə yanaşı, məktəb, uşaq bağçası, istirahət parkı və digər sosial infrastruktur da yaradılıb. Kəndə qayıdan sakinlər üçün müasir və təhlükəsiz yaşayış şəraiti təmin edilib. Bu, dövlətin Böyük Qayıdış siyasətinin yalnız insanların doğma torpaqlara köçürülməsindən ibarət olmadığını, eyni zamanda həmin ərazilərdə dayanıqlı və rahat həyatın qurulmasını nəzərdə tutduğunu göstərir.
Laçın rayonunda Güləbird, Qorçu və digər yaşayış məntəqələrində də genişmiqyaslı bərpa və tikinti işləri həyata keçirilir. Bu ərazilərin yenidən qurulması və infrastrukturla təmin edilməsi gələcəkdə rayonun digər sakinlərinin də doğma torpaqlarına qayıtmasına imkan yaradacaq. Güləbird və Qorçu kəndləri üzrə baş planların təsdiq edilməsi də rayonun yaşayış məntəqələrinin mərhələli şəkildə dirçəldilməsinin göstəricisidir. Laçına qayıdış Azərbaycan xalqının uzun illər ərzində yaşadığı torpaq həsrətinin sona çatmasının rəmzidir. Bu qayıdış həm də işğaldan azad edilmiş ərazilərdə həyatın bərpası, yeni iş yerlərinin yaradılması, sosial infrastrukturun qurulması və əhalinin dayanıqlı məskunlaşmasının təmin edilməsi baxımından böyük əhəmiyyət daşıyır. Bu gün Laçın şəhərində və Zabux, Sus kəndlərində həyat yenidən canlanıb. İnsanların doğma evlərinə qayıtması, uşaqların məktəblərdə təhsil alması, yeni iş yerlərinin yaradılması və sosial obyektlərin fəaliyyət göstərməsi Laçının yeni inkişaf mərhələsinə qədəm qoyduğunu göstərir.
Ümid Hacısoy- Fəal gənc, Tələbə
Şərh yazın