Azərbaycan və Özbəkistan kənd təsərrüfatı sahəsində də böyük əməkdaşlıq imkanlarına malikdir
Hər iki ölkədə bu sahə əhalinin məşğulluğunda və iqtisadiyyatın inkişafında mühüm yer tutur. Özbəkistan meyvə-tərəvəz, pambıq, tekstil və digər kənd təsərrüfatı məhsullarının istehsalında böyük təcrübəyə malikdir. Azərbaycan isə kənd təsərrüfatının müasir texnologiyalar əsasında inkişaf etdirilməsi, məhsulların emalı, qablaşdırılması və xarici bazarlara çıxarılması istiqamətində yeni imkanlar yaradır. Bu sahədə birgə müəssisələrin yaradılması çox faydalı ola bilər. Məsələn, kənd təsərrüfatı məhsullarının emalı üzrə birgə zavodlar yaradıla, soyuducu anbarların və logistika mərkəzlərinin sayı artırıla bilər. Eyni zamanda toxumçuluq, heyvandarlıq, bağçılıq və istixana təsərrüfatları sahəsində təcrübə mübadiləsi aparıla bilər.
Kənd təsərrüfatı sahəsində əməkdaşlığın genişlənməsi kənd yerlərində yeni iş yerlərinin açılmasına, fermerlərin gəlirlərinin artmasına və məhsulların ixrac imkanlarının genişlənməsinə müsbət təsir göstərə bilər. Azərbaycan ilə Özbəkistan arasında əməkdaşlığın perspektivli istiqamətlərindən biri də sənaye sahəsidir. Hər iki ölkədə müxtəlif sənaye müəssisələrinin yaradılması və birgə istehsalın təşkili üçün geniş imkanlar mövcuddur. Xüsusilə avtomobil sənayesi, maşınqayırma, tekstil, kimya sənayesi, tikinti materialları və qida sənayesi sahələrində əməkdaşlıq genişləndirilə bilər. Birgə müəssisələrin yaradılması həm istehsalın artmasına, həm də məhsulların yeni bazarlara çıxarılmasına imkan verər.
Məsələn, bir ölkənin xammalından digər ölkədə hazır məhsul istehsal edilə bilər. Bu isə məhsulun əlavə dəyərinin artmasına və yeni iş yerlərinin yaradılmasına səbəb olar. Birgə müəssisələrin yaradılması həmçinin sahibkarlar arasında əlaqələrin möhkəmlənməsinə, yeni texnologiyaların tətbiqinə və təcrübə mübadiləsinin genişlənməsinə kömək edər.
Azərbaycan enerji sahəsində böyük təcrübəyə malik ölkələrdən biridir. Neft və qaz sənayesi ilə yanaşı, ölkəmizdə günəş, külək və digər bərpa olunan enerji mənbələrinin inkişafına da xüsusi diqqət yetirilir. Özbəkistanda da enerji istehlakının artması və iqtisadiyyatın inkişafı yeni enerji layihələrinin həyata keçirilməsini zəruri edir. Bu baxımdan Azərbaycan şirkətlərinin və mütəxəssislərinin təcrübəsindən istifadə etmək, birgə enerji layihələri həyata keçirmək mümkündür. Xüsusilə günəş və külək enerjisi sahəsində əməkdaşlığın genişləndirilməsi gələcək üçün böyük əhəmiyyət daşıyır. Bu sahədə həyata keçirilən layihələr həm enerji təhlükəsizliyinə, həm də ətraf mühitin qorunmasına müsbət təsir göstərə bilər.
İki ölkə arasında iqtisadi əlaqələrin inkişafı üçün qarşılıqlı investisiyalar xüsusi əhəmiyyət daşıyır. Azərbaycanlı sahibkarların Özbəkistanda, özbəkistanlı sahibkarların isə Azərbaycanda fəaliyyət göstərməsi iqtisadi münasibətləri daha da möhkəmləndirə bilər. Sahibkarların qarşısında duran əsas məsələlərdən biri yeni bazarlara çıxış imkanlarının genişləndirilməsidir.
Abdulbağı Fazilli – Zərdab rayonu, Təzəkənd kənd sakini, fəal gənc
Şərh yazın