Şuşa Bəyannaməsində iqtisadi əməkdaşlıq da önəmli yer tutur
Azərbaycan və Türkiyə qarşılıqlı investisiyaların artırılması, sənaye sahəsində əməkdaşlığın genişləndirilməsi, ticarət dövriyyəsinin yüksəldilməsi istiqamətində fəaliyyətlərini daha da gücləndirirlər. Bu əməkdaşlıq hər iki ölkənin iqtisadi inkişafına müsbət təsir göstərir. Enerji sahəsində əməkdaşlıq da Şuşa Bəyannaməsinin mühüm istiqamətlərindən biridir. Azərbaycan enerji resurslarının dünya bazarlarına çatdırılmasında Türkiyə ilə uzun illərdir sıx əməkdaşlıq edir. Bakı-Tbilisi-Ceyhan neft kəməri, TANAP layihəsi və digər strateji enerji layihələri bunun ən uğurlu nümunələridir. Şuşa Bəyannaməsi bu əməkdaşlığın gələcəkdə daha da genişlənməsinə şərait yaradır. Nəqliyyat və kommunikasiya sahəsində əməkdaşlıq da sənədin əsas prioritetlərindən biridir. Xüsusilə Zəngəzur dəhlizinin açılması perspektivi region üçün böyük əhəmiyyət daşıyır. Bu dəhliz Azərbaycanı Naxçıvan vasitəsilə Türkiyə ilə birbaşa birləşdirəcək, eyni zamanda Avropa ilə Asiya arasında yeni nəqliyyat və ticarət imkanları yaradacaq. Bu layihənin reallaşması Türk dünyasının iqtisadi və logistika əlaqələrinin daha da möhkəmlənməsinə xidmət edəcək. Şuşa Bəyannaməsi yalnız siyasi və iqtisadi məsələləri deyil, humanitar sahələri də əhatə edir. Təhsil, elm, mədəniyyət, gənclər siyasəti və idman sahələrində əməkdaşlığın genişləndirilməsi nəzərdə tutulur. Bu əməkdaşlıq xalqlar arasında əlaqələrin daha da güclənməsinə, ortaq dəyərlərin qorunmasına və gələcək nəsillərin daha sıx münasibətlər şəraitində yetişməsinə xidmət edir.
Sənəddə diaspor təşkilatlarının və media qurumlarının əməkdaşlığına da xüsusi diqqət ayrılıb. Dünyanın müxtəlif ölkələrində yaşayan azərbaycanlı və türk icmalarının birlikdə fəaliyyət göstərməsi, milli maraqların müdafiəsi və həqiqətlərin beynəlxalq ictimaiyyətə çatdırılması baxımından bu istiqamət böyük əhəmiyyət daşıyır. Şuşa Bəyannaməsi eyni zamanda Cənubi Qafqaz regionunda sülhün və sabitliyin möhkəmləndirilməsinə xidmət edən mühüm siyasi sənəddir. Azərbaycan və Türkiyə bölgədə əməkdaşlıq mühitinin formalaşmasını, iqtisadi əlaqələrin genişlənməsini və təhlükəsizliyin təmin olunmasını dəstəkləyirlər. Bu baxımdan sənəd regionun gələcək inkişafı üçün mühüm strateji platforma hesab olunur. Bu gün Şuşa Bəyannaməsi Azərbaycan-Türkiyə münasibətlərinin ən mühüm siyasi sənədlərindən biri kimi qiymətləndirilir. Sənəd iki qardaş dövlətin münasibətlərini yeni mərhələyə yüksəldib, qarşılıqlı etimadı və əməkdaşlığı daha da gücləndirib. Şuşa Bəyannaməsi həm Azərbaycan və Türkiyənin milli maraqlarına xidmət edir, həm də regionda sülhün, sabitliyin və inkişafın təmin olunmasına mühüm töhfə verir.
Aradan keçən illər göstərir ki, Şuşa Bəyannaməsi təkcə bir sənəd deyil, Azərbaycan-Türkiyə qardaşlığının gələcək inkişafını müəyyən edən mühüm yol xəritəsidir. Bu sənəd iki dövlətin birliyinin, həmrəyliyinin və ortaq gələcəyə inamının ən parlaq ifadələrindən biri olaraq tarixdə xüsusi yer tutur.
Cavid Nuriyev – Zərdab şəhər sakini, fəal gənc
Şərh yazın