Müasir çağırışlar fonunda etibarlı tərəfdaşlıq modeli
Son illərdə dünyada baş verən geosiyasi proseslər fonunda Azərbaycan ilə Ukrayna arasında münasibətlər daha da önəmli xarakter alıb. Xüsusilə Rusiya–Ukrayna müharibəsinin davam etdiyi bir dövrdə bu əlaqələr həm siyasi, həm humanitar, həm də iqtisadi baxımdan xüsusi əhəmiyyət kəsb edir. Azərbaycan bu məsələdə balanslı və prinsipial mövqe nümayiş etdirərək Ukraynanın ərazi bütövlüyünü dəstəklədiyini açıq şəkildə bəyan edir.
Azərbaycan yalnız siyasi bəyanatlarla kifayətlənmir, konkret humanitar addımlar da atır. Müharibədən zərər çəkmiş ukraynalı uşaqların Azərbaycanda reabilitasiyası bu istiqamətdə atılan ən mühüm addımlardan biridir. İndiyədək yüzlərlə uşağın sağlamlığının bərpasına və psixoloji dəstək almasına şərait yaradılıb. Bu, sadəcə dövlətlərarası münasibət deyil, həm də xalqlar arasında humanitar həmrəyliyin nümunəsidir.
Digər mühüm əməkdaşlıq sahəsi minatəmizləmə istiqamətidir. Azərbaycan uzun illər işğal altında qalmış ərazilərində genişmiqyaslı minatəmizləmə işləri apararaq bu sahədə ciddi təcrübə qazanıb. Bu təcrübənin Ukrayna ilə paylaşılması həm praktiki, həm də humanitar baxımdan böyük əhəmiyyət daşıyır. Çünki müharibədən sonra ən böyük problemlərdən biri məhz minalanmış ərazilərin təhlükəsiz hala gətirilməsidir. Enerji sahəsində əməkdaşlıq da xüsusi diqqət çəkir. Ukrayna enerji təhlükəsizliyini təmin etmək və mənbələri şaxələndirmək istəyir. Azərbaycan isə artıq Avropanın enerji bazarında etibarlı tərəfdaş kimi mövqeyini möhkəmləndirib. Bu baxımdan, Azərbaycan qazının müxtəlif marşrutlar vasitəsilə Ukraynaya çatdırılması perspektivləri hər iki tərəf üçün faydalıdır. Bu əməkdaşlıq təkcə iqtisadi deyil, həm də strateji əhəmiyyət daşıyır.
Azərbaycanın Ukraynada iqtisadi fəaliyyəti də diqqətəlayiqdir. Azərbaycan şirkətlərinin, xüsusilə enerji sektorunda fəaliyyət göstərən qurumların Ukrayna bazarında mövcudluğu münasibətlərin davamlı xarakter daşıdığını göstərir. Hətta müharibə şəraitində belə bu əlaqələrin qorunub saxlanılması tərəflər arasında yüksək etimadın göstəricisidir.Təhlükəsizlik və müdafiə sənayesi sahəsində əməkdaşlıq imkanları da kifayət qədər genişdir. Azərbaycan son illərdə öz hərbi potensialını gücləndirib və müasir texnologiyalara əsaslanan ordu quruculuğu həyata keçirib. Bu sahədə əldə olunan təcrübə Ukrayna üçün də maraqlı ola bilər. Birgə istehsal və texnologiya mübadiləsi gələcək əməkdaşlığın əsas istiqamətlərindən biri kimi görünür.
Azərbaycanın xarici siyasətdə balanslı mövqe tutması xüsusi qeyd olunmalıdır. Rəsmi Bakı nə sanksiyalara qoşulur, nə də münaqişə tərəflərindən birinə qarşı açıq mövqe sərgiləyir. Bunun əvəzinə, Azərbaycan bütün tərəflərlə münasibətləri qoruyaraq praqmatik siyasət yürüdür. Bu yanaşma ölkəni beynəlxalq arenada etibarlı tərəfdaş və potensial vasitəçi kimi önə çıxarır.Hətta Ukrayna Prezidenti Volodimir Zelenski tərəfindən gələcəkdə mümkün sülh danışıqlarının Azərbaycanda keçirilə biləcəyi ilə bağlı səsləndirilən fikir də bu etimadın göstəricisidir. Bu, Azərbaycanın beynəlxalq nüfuzunun artdığını və diplomatik platforma kimi qəbul edildiyini göstərir. Azərbaycan və Ukrayna arasında münasibətlər yalnız bugünkü maraqlara deyil, həm də uzunmüddətli perspektivə hesablanıb. Bu əməkdaşlıq modeli qarşılıqlı fayda, etimad və real nəticələr üzərində qurulub. Sadə vətəndaş baxımından da bu münasibətlər ümidverici görünür, çünki bu, həm regionda sabitliyə, həm də gələcək inkişaf imkanlarına töhfə verir.
Kəmalə Əliyeva – Zərdab rayonu, Qaravəlli kənd tam ümumtəhsil məktəbinin direktoru
Şərh yazın