Vəhşiliyin təzahürü.
31 Mart – Azərbaycanlıların Soyqırımı Günü bu faciəli tarixi xatırlamaq və unudulmaz dərsləri gələcək nəsillərə çatdırmaq baxımından xüsusi əhəmiyyət kəsb edir. XX əsrin əvvəllərində azərbaycanlılara qarşı törədilən qırğınlar vəhşiliyin ən açıq təzahürü idi. 1918-ci ilin mart ayında baş verən hadisələr zamanı dinc əhali məqsədyönlü şəkildə hədəf alınmış, qadınlar, uşaqlar və qocalar amansızcasına qətlə yetirilmişdir. Yüzlərlə yaşayış məntəqəsi dağıdılmış, kəndlər talan edilmiş və yandırılmışdır. Bu vəhşilik yalnız fiziki məhvetmə ilə bitməyib, həm də insanların mənəvi dünyasına, ailələrinə və həyat tərzinə yönəlmiş terror siyasətinin bir hissəsi olmuşdur. Tarixi sənədlər və şahid ifadələri göstərir ki, azərbaycanlıların qətliamı planlı şəkildə həyata keçirilmişdir və təsadüfi hadisə deyil.
Bu gün həmin hadisələrin xatirəsi xalqımızın yaddaşında yaşayır. 31 Mart günü keçirilən anım mərasimləri, elmi araşdırmalar və maarifləndirici tədbirlər vəhşiliyin qarşısını almaq, tarixi həqiqətləri qorumaq və gələcək nəsillərə ötürmək məqsədi daşıyır. Tarixin bu qanlı səhifəsini unutmamaq və qurbanların xatirəsini yad etmək hər birimizin mənəvi borcudur. İnsanlığa qarşı törədilmiş vəhşiliklərin dünyada təkrarlanmaması üçün bu dərslər həmişə canlı qalmalıdır.
Zərdab rayon Gəlmə kənd sakini, gənc fəal- Əli Tağızadə
Şərh yazın