Azərbaycan xalqı hər zaman Prezident İlham Əliyevi dəstəkləyib
Müstəqil Azərbaycanın siyasi tarixində xalq–lider münasibətləri xüsusi əhəmiyyət daşıyır. Bu münasibətlərin ən bariz nümunələrindən biri Azərbaycan xalqının Prezident cənab İlham Əliyevə göstərdiyi davamlı və qətiyyətli dəstəkdir. Son iyirmi ildən artıq dövr ərzində keçirilmiş bütün prezident seçkiləri bu dəstəyin açıq və birmənalı ifadəsi olmuşdur. Xalqın etimadı, siyasi iradəsi və seçki nəticələri Prezident cənab İlham Əliyevin həyata keçirdiyi dövlət siyasətinə verilən yüksək qiymətin göstəricisidir.
2003-cü il oktyabrın 15-də keçirilmiş prezident seçkiləri Azərbaycan tarixində mühüm mərhələ oldu. Ümummilli Lider Heydər Əliyevin siyasi kursunun davamçısı kimi çıxış edən İlham Əliyev seçicilərin 76 faizindən çoxunun səsini qazanaraq Azərbaycan Respublikasının Prezidenti seçildi. Bu seçim xalqın sabitliyə, inkişafın davamlılığına və güclü dövlətçilik xəttinə verdiyi dəstəyin ifadəsi idi. Həmin dövrdə Azərbaycan artıq möhkəm siyasi sabitliyə nail olmuş, lakin qarşıda böyük sosial-iqtisadi və təhlükəsizlik çağırışları dayanırdı. Xalq İlham Əliyevə səs verməklə bu çağırışların öhdəsindən gələcək siyasi iradəyə və idarəetmə qabiliyyətinə inamını nümayiş etdirdi.
2008-ci il oktyabrın 15-də keçirilmiş prezident seçkiləri Azərbaycan xalqının Prezident cənab İlham Əliyevin fəaliyyətinə verdiyi yüksək qiymətin daha aydın göstəricisi oldu. Seçicilərin 88,73 faizinin səsini qazanaraq ikinci dəfə Prezident seçilən İlham Əliyev bu nəticə ilə xalqın artan etimadını təsdiqlədi. Bu dövrdə ölkədə genişmiqyaslı iqtisadi islahatlar həyata keçirilmiş, regionların sosial-iqtisadi inkişafı təmin olunmuş, infrastruktur layihələri sürətləndirilmişdi. Sosial rifahın yüksəlməsi, yoxsulluğun azalması və yeni iş yerlərinin yaradılması cəmiyyətin bütün təbəqələrində dövlət siyasətinə inamı gücləndirmişdi.
2013-cü il oktyabrın 9-da keçirilmiş prezident seçkilərində İlham Əliyev seçicilərin 84,54 faiz səsini qazanaraq növbəti dəfə dövlət başçısı seçildi. Bu nəticə bir daha sübut etdi ki, Azərbaycan xalqı islahatların ardıcıl davam etdirilməsini, sabitliyin qorunmasını və ölkənin strateji inkişaf xəttinin dəyişməz qalmasını dəstəkləyir. Bu mərhələdə Azərbaycan artıq regionun aparıcı dövlətlərindən birinə çevrilmiş, beynəlxalq aləmdə etibarlı tərəfdaş kimi tanınmışdı. Enerji, nəqliyyat və logistika layihələri ölkənin geosiyasi və geoiqtisadi mövqelərini möhkəmləndirmişdi.
2018-ci il aprelin 11-də keçirilmiş prezident seçkilərində İlham Əliyevin seçicilərin 86,02 faiz səsini qazanaraq yenidən Prezident seçilməsi xalqın güclü liderlik institutuna verdiyi dəstəyin növbəti təzahürü oldu. Bu seçim müasir çağırışlar fonunda Azərbaycanın müstəqil siyasət yürütmək əzmini və milli maraqlara əsaslanan kursunu təsdiqlədi.
Xalq bu seçimlə Prezident cənab İlham Əliyevin həyata keçirdiyi islahatların, güclü ordu quruculuğunun və milli maraqlara söykənən xarici siyasətin davam etdirilməsini dəstəklədi.
Azərbaycan xalqının Prezident İlham Əliyevə göstərdiyi daimi dəstəyin əsas səbəbləri onun siyasətinin real nəticələrə əsaslanmasıdır. Güclü iqtisadiyyatın formalaşdırılması, sosial ədalət prinsiplərinin qorunması, regionların balanslı inkişafı, müasir infrastrukturun yaradılması və milli təhlükəsizliyin təmin edilməsi bu siyasətin əsas sütunlarıdır.
Eyni zamanda, Prezident İlham Əliyevin verdiyi vədlərin əməli nəticələrlə təsdiqlənməsi xalq–lider etimadını daha da möhkəmləndirmişdir. Xüsusilə 2020-ci ildə Vətən müharibəsində qazanılmış tarixi Zəfər bu etimadın ən yüksək zirvəsi olmuşdur.
Seçkilərdə əldə olunan yüksək səs göstəriciləri Prezident İlham Əliyevin siyasi legitimliyinin möhkəm ictimai dayaqlara söykəndiyini göstərir. Bu legitimlik dövlətin həyata keçirdiyi bütün strateji qərarların arxasında xalq iradəsinin dayandığını təsdiqləyir.
Azərbaycan xalqının öz Prezidentinə verdiyi dəstək milli birliyin, siyasi sabitliyin və gələcəyə inamın əsas təminatçısıdır. Son iyirmi ildən artıq dövrdə keçirilmiş prezident seçkiləri göstərir ki, Azərbaycan xalqı hər zaman Prezident İlham Əliyevi dəstəkləmiş, onun həyata keçirdiyi siyasətə yüksək etimad göstərmişdir. Seçkilərdə əldə olunan yüksək nəticələr bu dəstəyin statistik ifadəsi olmaqla yanaşı, həm də xalqın milli maraqlara, sabitliyə və inkişaf strategiyasına verdiyi dəyərin göstəricisidir. Bu etimad və dəstək müasir Azərbaycan dövlətçiliyinin möhkəmliyini təmin edən əsas amillərdən biri kimi ölkənin gələcək inkişafında da həlledici rol oynayacaqdır.
Zərdab rayon Heydər Əliyev Mərkəzinin əməkdaşı Alagöz Namazova
Şərh yazın